मराठा आरक्षणप्रकरणी मनोज जरांगे यांनी सरकारला दिलेली डेडलाईन येत्या 24 डिसेंबरला संपणार आहे. 24 तारखेनंतर एक तासही वाढवून मिळणार नसल्याचं जरांगेंनी सांगितलं आहे. तसंच 23 डिसेंबरला बीडमध्ये इशारा सभेचंही आजोजन करण्यात आलं आहे.
Maratha Reservation : मनोज जरांगे 24 डिसेंबरच्या मुदतीवर ठाम आहेत. एका तासानंही मुदत वाढवून देणार नसल्याची भूमिका त्यांनी अंतरवाली सराटीत बैठकीनंतर मांडली. ग्रामविकासमंत्री गिरीश महाजन (Girish Mahajan) यांनी मुदत वाढवून देण्याबाबत शनिवारी विनंती केली होती. मात्र सरकारची ही विनंती जरागेंनी धुडकावून लावलीय. 24 डिसेंबरपर्यंत मराठ्यांना ओबीसीतून आरक्षणाचा (Maratha Reservation) कायदा पारित न केल्यास 23 डिसेंबरला पुढील आंदोलनाची दिशा ठरवणार असल्याचा इशारा मनोज जरांगेंनी (Manoj Jarange Patil) दिलाय. मराठा समाजातल्या प्रतिनिधींसोबत त्यांनी अंतरवाली सराटीत बैठक घेतली. या बैठकीत पुढच्या रणनीतीवर चर्चा करण्यात आली.
छगन भुजबळांबदद्ल नाराजी
मनोज जरांगे पाटील आणि छगन भुजबळांमधली (Chagan Bhujbal) नाराजी टोकाला गेल्याचं पुन्हा एकदा स्पष्ट झालं. जरांगेंची समजूत काढण्यासाठी आलेले मंत्री गिरीश महाजन आणि सांदिपान भुमरे यांच्याकडे जरांगेंनी भुजबळांची तक्रार केली. भुजबळ मराठ्यांबद्दल विषारी का बोलतात, असा सवाल जरांगेंनी केला. तर वाद थांबवण्याची विनंती भुजबळांना करणार असल्याचं महाजनांनी स्पष्ट केलं.
दरम्यान, मराठा आरक्षणासाठी 23 डिसेंबरला जरांगे पाटील यांची बीडमध्ये भव्य सभा होणार आहे. 24 तारखेला सरकारला दिलेला अल्टिमेटम संपणार आहे. त्यामुळे बीडमझल्या सभेत जरांगे काय बोलणार याकडे मराठा समाजाचं लक्ष लागलं आहे. जरांगेच्या इशारा सभेची जोरदार तयारी सुरु आहे.